المشاركات
يعني إيه الانتخاب بنظام القائمة النسبية اللي مجلس الوزرا بيدرسه حالياً؟
فيه تقريباً 3 أنظمة رئيسية للانتخاب (ومش هانتكلم في تفريعاتها عشان لو عملنا كده قدامنا لحد بكرة الصبح)
- النظام الفردي
- نظام القائمة : قائمة لكل حزب – قائمة موحدة
- نظام مختلط (بيخلط النظام الفردي بنظام القائمة)
النظام الفردي : كل تيار او حزب بينزل مرشح عن دايرة معينة... الناخب يوم الانتخابات بيروح مركز التصويت في دايرته ويختار واحد بس من المرشحين دول ويديله صوته. وفي كل دايرة، المرشح اللي واخد عدد أكبر من الأصوات هو اللي بياخد المقعد. وده النظام اللي تم العمل بيه في مصر من 1971 لحد 1984 وبعدين من 1990 لحد دلوقتي.
نظام القائمة: كل حزب بينزل قايمة فيها أسامي المرشحين بتوعه في الدواير المختلفة... والناخب بيكون دوره انه يا اما يختار القايمة بتاعة حزب الوفد مثلاً على بعضها أو يختار القايمة بتاعة حزب الغد مثلاً كلها على بعضها بغض النظر بقى عن انه ممكن تكون بعض الأسماء اللي نازلة في قايمة الحزب مش عاجباه... المهم لما بيجوا يحسبوا النتيجة في الآخر، بيشوفوا قايمة حزب الوفد اخدت كام من نسبة الأصوات وقايمة الغد أخدت نسبة كام من الأصوات و لو قايمة الوفد خدت 40% من أصوات الناخبين يبقى حزب الوفد ياخد 40% من المقاعد.
طيب دلوقتي افرض حزب الوفد نزل قايمة فيها مثلاً 200 اسم على اساس ان عدد المقاعد اللي بيتم التنافس عليها 200 ... وبعد ما طلعت النتيجة لقوا انه ياخد 40% من المقاعد يعني ياخد 80 مقعد، باقي الـ 120 اسم التانيين اللي كان منزلهم ضمن القايمة بتاعته بيروحوا فين ؟
أي قايمة بينزلها أي حزب بتكون أسامي المرشحين فيها مترتبة حسب الاولوية، يعني اول 80 اسم في أي قايمة بيكونوا أسامي أكتر 80 مرشح مهم بالنسبة للحزب، لو الحزب اخد 80 مقعد، المقاعد دي بتروح لأول 80 اسم على قايمة الحزب وباقي الـ120 اسم "بيخرجوا من المولد بلا حمص".
النظام المختلط: في النظام ده، نص البرلمان بيتم انتخابه بالنظام الفردي والنص التاني بنظام القائمة. وعشان يتم الكلام ده، كل حزب بينزل بحاجتين: قايمة ومرشح فردي ... الناخب بيروح مركز الاقتراع وبيكون مطلوب منه يختار حاجتين : قايمة الحزب اللي بيفضله والمرشح الفردي اللي هو عايزه... ولما نيجي نحسب الحسبة في الآخر، لو لقينا ان قايمة حزب الوفد اللي كان فيها 100 اسم مثلاً خدت 40% من الأصوات يبقى تاخد 40 مقعد في البرلمان و في نفس الوقت لو 2 من مرشحيها كسبوا في الانتخابات الفردية يبقى عدد مقاعدها ككل في البرلمان هاتيبقى 42 مقعد.
طب وليه مجلس الوزرا عايز يغير نظام الانتخابات من النظام الفردي الي كنا ماشيين عليه لنظام القايمة النسبية ؟
عشان نعرف السبب، لازم الأول نشوف مزايا وعيوب كل نظام فيهم.
