تحليل نتائج أول استطلاع رأي على الاستفتاء

http://thawrastats.org/2011/03/18/%d8%a5%d8%b3%d8%aa%d8%b7%d9%84%d8%a7%d8%b9-%d8%b1%d8%a3%d9%8a-%d9%a3%d9%a1%d9%a8/#more-61

نعم: ٥٣.٥% لا: ٤٦.٥% (فرق غير ذو دلالة إحصائية


قبل يوم واحد من أول إستفتاء ديمقراطي في تاريخ مصر الحديث، نتائج إستطلاع مركز ثورة تشير إلى إن أراء المصريين في الاستفتاء عن التعديلات الدستورية منقسمة بطريقة يصعب معها التنبؤ بالنتيجة النهائية.
الإستطلاع تم في المدة ما بين ٣/١٥ – ٣/١٧ و شمل عينة حجمها ٥٣٠ ناخب موزعين على ٢٦ محافظة في الجمهورية. ٨٠٪ من المشاركين صرحوا بنيتهم التصويت في الإستفتاء المزمع إجراؤه يوم ٣/١٩. ٥٣.٥% ممن قرروا المشاركة قالوا انهم سيصوتوا بنعم على التعديلات إلتي تشمل تعديل ٨ مواد في دستور ١٩٧١، إلغاء مادة، و إضافة مادتان. ٤٦.٥% قالوا انهم سيصوتوا بلا للتعديلات إلتي ،في نظرهم ،تحاول ترقيع دستور يقولون إن ثورة ٢٥ يناير اطاحت به. جدير بالذكر إن هامش الخطأ في العينة الإحصائية هو ± ٧٪ (بمعنى إن الخياران – نعم أو لأ- لازالا قائمين)

الدلتا ضد الجميع
بالنظر للنتائج نلاحظ توجهات كثيره أثرت على اختيارات المشاركين.من أكثر الاشياء الملفتة كانت التباين الجغرافي الكبيير في الاختيارات. الأغلبية في كل مناطق الجمهورية رفضت التعديلات (بنسب تتراوح بن ٥٣٪ في الصعيد ل-٥٦٪ في القاهرة) باستثناء منطقة الدلتا إلتي كانت مؤيدة التعديلات باغلبية كبيرة جداً (٧٣٪ – ٢٧٪ ).جزء من أسباب هذا الفرق الكبير هو وجود نسبة كبيره من السكان في مناطق ريفيه (في المجمل المشاركيين من الريف فضلوا التعديلات بنسبة ٧٠٪ بعكس أهل المدن الذين رفضوها بنسبة ٥٩٪).سبب محتمل أخر هو تمركز جماعة الاخوان المسلميين في الكثير من قرى الدلتا، و لو إن الإستطلاع لم يظهر أي دليل على هذه النظرية

مأزق الطبقة الوسطى
من الأشياء الملحوظة أيضاً كان التوزيع الطبقي للمشاركيين و تأثيره على اختياراتهم. المفاجأة هنا لم تكن إستقطاب اختيار نعم لطرف واحد، بل إن طرفي توزيع الدخل مالا بدرجة كبيرة لتأييد التعديلات. ٥٤٪ ممن كان دخلهم أكتر من ٥٠٠٠ جنيه في الشهر و ٥٦٪ ممن دخلهم أقل من ١٠٠٠ جنيه أيدوا التعديلات. أصحاب الدخول المتوسطة كانوا أكبر مجموعة رافضة التعديلات (بنسبة ٥٤٪). سبب من أسباب هذه الظاهرة هي إن أصحاب الدخول المنخفضة والعالية هما أكبر مجموعتان يمكن أن يتأثرا مادياً باستمرار، ما يعتبرة البعض، حالة عدم الاستقرار أو الغموض السياسي


خطوط المعركة القادمة؟
في نفس الإستطلاع، بدأنا قياس حجم التأييد للمرشحين الرئاسيين المتوقعين والقوى السياسية المختلفة (نتائج هذه الاسئلة سوف تعلن تباعاً). المثير للإهتمام هنا هي العلاقة بين تأييد قوة أو شخصية سياسية معينة والموقف من التعديلات الدستورية على الاخص في ظل الإتهامات المتبادلة بين الاخوان المسلميين و ما يبدو كانه ائتلاف لليبرالي ناشئ. كما كان متوقع، أغلبية المؤيدين لجماعة الاخوان المسلمين (٧٠٪ منهم) أييدو التعديلات و هي نسبة قريبة من النسبة بين المؤيدين للحزب الوطني (٦٧٪). في المقابل ٧٢٪ من موئيدي محمد البرادعي، المرشح الرياسي المحتمل، رفضوا التعديلات. الغريب كان موقف مؤيدي عمرو موسى: فابالرغم إن عمرو موسى أعلن رفضه للتعديلات إلا إن المؤيدون له أيدوا التعديلات بنسبة ٨١٪ ! هذه الظاهرة قد تعني إن معظم التأييد لعمرو موسى معتمد على ذيوع إسمه وليس على إقتناع
بالضرورة بمواقفه

الطريق للا
يظهر للوهلة الاولى إن هذه النتائج تتوقع إن التعديلات الدستورية سوف يتم الموافقة عليها، و هنا يجب إن نوضح (دائماً) إن نتائج أي إستطلاع مبنية على الكثير من الافتراضات و لها حدود في لإستخدام. أول حد، و هو الذي أشرنا له سلفاً، هو هامش الخطأ. في أي إستطلاع رأي معتمد على عينة عشوائية هناك إحتمالية عدم تطابق العينة مع المجتمع المراد قياس رأيه. لهذا هامش الخطأ يعني إن، بنسبة ٩٥٪، النتيجة النهائية ستكون في حدود V٪ أعلى أو أقل من ما توقعناه.
من أهم الافتراضات أيضاً إفتراض إن تشكيل جموع الناخبين سيتطابق مع تشكيل المجتمع بأسره (مثلاً: إذا كان يوجد ٢٠٪ من الأميين مثلاً في مصر، فالافتراض هو أن ٢٠٪ من الناخبيين سيكونوا من الأميين)، في الواقع طبعاً تختلف الأمور (في أمريكا مثلاً: رغم إن المسنين يمثلوا نسبه قليلة من الشعب، فاانهم ينتخبوا بأعداد كبيرة). بما اننا في مصر لم يكن عندنا إنتخابات حقيقية من قبل فاانها من الصعوبة بما كان إن نتوقع تشكيل المنتخبين. لذلك افترضنا إن “الشعب” بتشكيله الكلي سوف يذهب للاستفتاء. لو ثبت ذلك (نسبة مشاركة عالية في كل مكان، بين كل الفئات) فى إن ثقتنا في الأرقام سوف تزيد إلى حد كبير.
يعني ذلك أن الرافضين للتعديلات لديهم أمل كبير في حال كانت نسبة المشاركة عالية في الاماكن الرافضة و بين الفئات الرافضة و قلت المشاركة في الدلتا و بين الطبقات الفقيرة أو الغنية.
أخيراً، الاحداث تتلاحق بسرعة كبيرة، و بالرغم اننا اجرينا الإستفتاء خلال ال ٤٨ ساعة السابقة، فان هناك إحتمال أن يكون عدد كبير من الناخبيين قد غير رأيه بالفعل بسبب الحملات الاعلامية الكبيرة جداً من الطرفيين.

حتى المادة 189 مكرر غير ملزمة بوضع دستور جديد

حوار مبسط لشرح الخلاف على التعديلات الدستورية

س: هو ايه اللي اتعدل بالظبط ؟ والتعديلات دي كافية ولا لأ ؟
ج: اللي اتعدل يا سيدي في الدستور هما 8 مواد :

أولاً: المادة 75 اللي بتحدد شروط مرشح الرئاسة : والتعديل بيشترط ان اللي يرشح نفسه لرئاسة الجمهورية لازم يكون مصرى الجنسية هو ووالده ووالدته وزوجته مع منع أصحاب الجنسية المزدوجة من حق الترشح للرئاسة... مع العلم بأن النص القديم كان بيسمح لأصحاب الجنسية المزدوجة و المتزوجين من أجنبية انهم يترشحوا للرئاسة ..

س: بس دي مش قضية يعني... وبعدين اذا كانت المحكمة الادارية سبق وقالت ان أصحاب الجنسية المزدوجة ماينفعش يدخلوا مجلس الشعب، واذا كان ماينفعش العاملين في السلك الدبلوماسي والجيش يتجوزا أجنبية وإلا يفقدوا وظيفتهم، يبقى هانيجي على الرئيس يعني ونقف؟
ج: لو انت شايف ان اللي عنده جنسية مزدوجة أو متجوز أجنبية ولاءه مش هايكون لمصر فدي وجهة نظرك ووجهة نظر القضاه بتوع المحكمة الادارية... والقضاة مهما كانوا بشر وأحكامهم قايمة على اجتهادات ماهياش مقدسة ... بس في النهاية الحق في الترشح للرئاسة من الحقوق السياسية المكفولة لكل مواطن معاه الجنسية المصرية... ولا يجوز لأي جهة حرمانه من الحق ده استناداً على مجرد "اجتهادات" أو "وجهات نظر"...

س: ما علينا... ايه السبع مواد التانية اللي اتعدلت ؟
ج:
ثانياً: المادة 76 اللي حددت ثلاث طرق للترشح لمنصب الرئيس: إما انه المرشح ياخد تزكية من 30 عضواً فى مجلس الشعب، أو يجمع 30 ألف توقيع من 15 محافظة على مستوى الجمهورية، أو انه يكون عضو فى حزب له على الأقل مقعد واحد فى مجلس الشعب أو الشورى... مع العلم بأن النص القديم كان مفصل طرق الترشح على مقاس "جيمي" والحزب الوطني وتابعيه...

ثالثاً: المادة 77 اللي حددت مدة الرئيس بـ 4 سنين ممكن تتجدد مرة واحدة بس ... مع العلم بأن النص القديم كان مخلي مدة الرئيس 6 سنين وممكن تتجدد لمرات غير محدودة

رابعاً: المادة 88 كمان اتعدلت ونصت على الإشراف القضائى الكامل على الانتخابات بداية من إعداد الجداول وحتى إعلان النتيجة

خامساً: المادة 93 نصت على أن الفصل في صحة عضوية البرلمان يكون من اختصاص المحكمة الدستورية العليا، وبكده تكون وضعت حد للسلطة اللي كان النص القديم مديها لمجلس الشعب بإن هو اللي يحدد صحة عضوية أعضاءه ويبقى زي ماكان فتحي سرور بيقول "سيد قراره" حتى لو المحاكم قضت ببطلان العضوية

سادساً: المادة 139 ودي نصت على وجوب تعيين نائب لرئيس الجمهورية

سابعاً: المادة 148 والخاصة بإعلان حالة الطوارئ واللي أكدت على عدم جواز تجديد حالة الطوارئ أكثر من 6 أشهر إلا باستفتاء عام بين أبناء الشعب

ثامناً: وأخيراً تعديل المادة 189 اللي بتحدد طريقة إعداد دستور جديد للبلاد والمادة 189 مكرر اللي بتلزم البرلمان الجاي ده على طول انه يشكل جمعية تأسيسية تحط دستور جديد...

س: طب ما التعديلات كويسة اهيه في مجملها... ليه بقي عايز تقول "لأ"..
ج: لأن المادة 189 مكرر رغم كونها بتلزم البرلمان الجاي انه يجتمع عشان يكون جمعية تأسيسية... بس في الوقت نفسه المادة بتقول انه لازم يلتزم بالقواعد اللي بتنظم عملية تعديل الدستور المتحددة في المادة 189 واللي وأولها انه لازم نسبة 50% من أعضاء البرلمان يطلبوا التعديل ده... وطبعاً ماحدش ضامن نتايج الانتخابات البرلمانية الجاية... وعليه، ماحدش ضامن ان نسبة الـ 50% دي تتوفر .. وبالتالي ماحدش ضامن ان الدستور يتعدل بعد كده...

س: طب واحنا ليه هانعوز نحط دستور جديد ؟ ماحنا عدلناه أهو...
ج: لأ ... اللي بيحصل حالياً مش تعديل للدستور وانما تعديل انتقائي لبعض مواد الدستور... يعني عشان نبسط الأمور ونوضحها، المجلس العسكري اختار بعض المواد بعينها من جوه الدستور وقال هي دي بس اللي هاتتعدل وساب مواد كتيرة تانية محتاجة تعديل...

س: زي ايه ؟
ج: زي المواد اللي بتدي صلاحيات واسعة وكبيرة للرئيس والمواد اللي بتخلي صلاحيات البرلمان محدودة ومابتخليهوش يمارس دوره في الرقابة على الرئيس والوزرا...

س: طب وايه المشكلة في ان المجلس بدأ بتعديل الـ 8 مواد اللي محتاجة تعديل فوري وساب المواد بتاعة صلاحيات الرئيس والبرلمان على اساس ان الرئيس والبرلمان الجداد يبقوا يعدلوها بعدين؟
ج: زي ماقلنا، المادة 189 مش بتلزم الرئيس ولا البرلمان المنتخب انهم يعملوا التعديل ده... يعني ممكن الرئيس والبرلمان الجداد مايعدلوش المواد دي ويرجع حال بلدنا على ماكان عليه: رئيس بصلاحيات كبيرة وبرلمان زي قلته ... وكأنه ماحصلتش ثورة

س: يعني انت عايز تفهمني ان الرئيس والبرلمان اللي هايكون الشعب انتخبهم في انتخابات حرة وهايكونوا بيعبروا عن الشعب، هايرفضوا يعدلوا المواد الباقية من الدستور ؟ ماهم اكيد هايعدلوه...
ج: مافيش حاجة اكيدة طالما مافيش نص قانوني ملزم... عايز تخاطر وتقول "نعم" على التعديل الحالي اعتماداً على ان الرئيس هايرضى بعد انتخابه انه يتنازل عن صلاحياته عن طيب نفس، ده اختيارك... فيه غيرك مش موافقين على المخاطرة... وعشان كده هايقولوا "لأ" ...

س: ماحدش قال انه الرئيس هايتنازل من نفسه عن صلاحياته... المادة 189 زي ما بتدي الرئيس حق طلب تعديل الدستور، بتدي نفس الحق لمجلس الشعب والشورى... يعني ممكن برضه البرلمان الجديد يطلب تعديل الدستور وهو اللي يقلل صلاحيات الرئيس ...
ج: انت عارف الانتخابات البرلمانية والبرلمان الجديد ده هايجي امتى ؟ مش قبل سنة ... الانتخابات الرئاسية هاتتعمل الأول وهايفضل الرئيس في السلطة بصلاحياته الكبيرة من غير برلمان يراقبه لحد الانتخابات البرلمانية ما تتعمل كمان سنة أو أكتر... ومن هنا بقى لحد ماتتعمل الانتخابات البرلمانية دي، لو انت عايز الرئيس الجاي يبقي في السلطة وفي ايده كل الصلاحيات الكبيرة دي وتستنى البرلمان سنة عقبال ما يجي يعدل "أو مايعدلش" صلاحياته، قول "نعم" يوم 19 مارس...

س: معلش ثواني ... ايه حكاية ان الانتخابات البرلمانية هاتكون بعد سنة دي ؟ أنا أخر معلوماتي انها في يونيه الجاي وقبل الانتخابات الرئاسية... ده اللي الجيش أعلن عنه
ج: فعلا، دي كانت خطة الجيش لحد أوائل مارس... بعدها اجتمع المجلس الأعلى للقوات المسلحة مع عدد من القيادات السياسية اللي أجمعت كلها على الطلب ده لأن عقد انتخابات البرلمان في خلال كام شهر مش هايسمح غير لبقايا الحزب الوطني والاخوان المسلمين انهم يخوضوها... بقية القوى السياسية مش هاتكون استعدت وبالتالي المنافسة مش هاتكون عادلة. والمجلس الأعلى للقوات المسلحة وعد انه هايقوم بدراسة الموضوع ده في ضوء اجماع القوي السياسية على ضرورته.

س: هممم، هايقوم بدراسة الموضووووووع... طب افرض درسه وقرر مايغيرش خطته وقرر ان الانتخابات البرلمانية تفضل في يونيه...
ج: ساعتها الناس مش هاتلاقي قدامها مرشحين غير فلول الحزب الوطني والاخوان عشان القوى التانية مش هاتكون لحقت تكون حزب أو حتى لحقت تعمل دعايا انتخابية لنفسها...

س: طب ما الناس طبيعي مش هاتنتخب تاني فلول الحزب الوطني بعد ماكنسته أثناء الثورة ولو انتخبوا الاخوان فطبيعي ان الاخوان هايطلبوا تعديل وتقليص صلاحيات الرئيس لأنهم من أشد اللي عانوا منها... فيعني بصراحة أنا مش قلقان لو حصلت الانتخابات البرلمانية قبل الرئاسية في يونيه... كمان مش متوقع ان الاخوان هايستحوذوا على أغلبية مقاعد البرلمان... لازم نخلي عندنا ثقة في ان الشعب اللي قام بالثورة قادر على التمييز بين المرشح اللي يناسبه والمرشح اللي مايناسبهوش. حتى اذا الناخبين شافوا ان الاخوان هم الأقدر على تمثيلهم، فده اختيارهم ولازم كلنا نحترمه.
ج: كلامك مظبوط... بس فيه فرق بين اني أعمل انتخابات مايبقاش فيها مرشحين غير الاخوان والوطني وبالتالي يبقى الناخب مضطر انه يختار "العدو أو البديل الوحيد للوطني" واني أعمل انتخابات فيها أكتر من بديل واحد للوطني بحيث أسمح للناخب بالاختيار ما بينهم ...

س: طب والجيش دخله ايه في ان القوي السياسية التانية مش جاهزة وماعندهاش قدرات تنظيمية زي بتاعة الاخوان... هي مش برضه القوى السياسية التانية دي كانت موجودة أيام الاخوان واللي كان بيسري عليها كان ساري على الاخوان ؟
ج: صح، بس اللي حصل في 25 يناير ان الاغلبية الصامتة من الشعب المصري واللي امتنعت لفترة طويلة عن المشاركة في الحياة السياسية قررت في لحظة ما انها تتخلى عن صمتها وتعلن عن موقفها... الخطوة دي بتقولنا ان فيه حركة سياسية مستقلة ظهرت في مصر مؤخراً كانت لفترة طويلة واخدة موقف من الساحة السياسية... والحركة السياسية دي لازم يكون لها تمثيل في البرلمان الجديد عشان هي اللي هاتقدر تعبر بصدق عن مطالب الثورة... الكلام ده مش هيكون ممكن غير لما يتم اتاحة الفرصة للحركة دي بأنها تتشكل في صورة حزب سياسي وتاخد وقتها في عمل دعايا انتخابية عشان تعلن عن المرشحين بتوعها...

س: طب افرض برضه ان الجيش ماستجبش لمقترح تأجيل الانتخابات البرلمانية، هايبقى ايه الوضع...
ج: المفروض دلوقتي المجلس الأعلى للقوات المسلحة بيستمد شرعيته في الحكم من الثورة، اذا خالف مطالبها الوضع ممكن يكون حرج وترجع الناس تملا تاني ميدان التحرير... ومافتكرش الجيش هايعوز الأمور ترجع تاني لما كانت عليه قبل 11 فبراير.

س: طيب ولو فرضنا ان الجيش وافق وأجل انتخابات البرلمان هايكون ايه وضع المرحلة الانتقالية؟
ج: الحل بسيط ومش معقد

أولاً: يتم اصدار اعلان دستوري في الفترة الانتقالية دي بحيث يحل مؤقتاً محل الدستور القديم اللي هو متعطل في الوقت الحاليً ... والاعلان الدستوري ده بيضم المبادئ الأساسية والعامة اللي مش مختلف عليها في الدستور ...

ثانياً : ان المجلس الأعلى للقوات المسلحة يقوم بتشكيل جمعية تأسيسية مكونة من أساتذة القانون الدستوري عشان تتولى عملية تعديل الدستور بما فيه صلاحيات الرئيس والبرلمان...

ثالثاً: ولأن تعديل الدستور عملية ممكن تستغرق حوالي عدة شهور (بس مش بتزيد عن ستة أشهر) ولأن الجيش عايز يسلم الحكم للمدنيين، ممكن يختار بعض الشخصيات المدنية ويكون بيها مجلس رئاسي يتولى الحكم في الفترة الانتقالية لحد ما الجمعية التأسيسية تخلص تعديل الدستور.

رابعاً: وبعد ما يتم استفتاء الشعب على الدستور والموافقة عليه، يتم تنظيم الانتخابات الرئاسية بحيث ان الجيش ينسحب براحته من الحياة السياسية ويسيب الحكم لرئيس مدني صلاحياته محدودة وغير مطلقة، ويتم بعدها اجراء انتخابات برلمانية تطلع لنا مجلس شعب وشورى بيمثلوا أطياف الشعب المصري المختلفة.

وقبل كل ده... لازم كل واحد فينا يستخدم صوته ويشارك في الاستفتاء... أنا هاقول "لأ" للتعديلات الدستورية... وانت لو لسة مقتنع بـ "نعم" قولها... ومع بعض، صوتك وصوتي هايشكلوا ملامح مصرنا الجديدة... وهايقولوا مصر بقت حرة...

أسباب الاختلاف على التعديلات الدستورية

بخصوص كون المادة 189 مكرر ملزمة للبرلمان بوضع دستور جديد

فيه ناس بتقول ان التعديلات الدستورية وبالتحديد المادة 189 مكرر بتلزم مجلس الشعب والشورى الجايين انهم يجتمعوا ويعملوا جمعية تأسيسية تحط دستور من أول وجديد وده لأن نص المادة 189 مكرر بيقول الآتي:

يجتمع الاعضاء غير المعينين لأول مجلسى شعب وشورى تاليين لإعلان نتيجة الأستفتاء على تعديل الدستور لأختيار الجمعية التأسيسية المنوط بها إعداد مشروع الدستور الجديد خلال ستة اشهر من انتخابهم وذلك كله وفقاً لأحكام الفقرة الأخيرة من المادة 189.

جميل جداً... الفقرة دي ممكن تدينا ايحاء بانها بتلزم مجلس الشعب والشورى الجايين بأنهم يحطوا دستور حديد لكن في الحقيقة ان المادة دي برضه مش ملزمة ... ليه؟

عشان آخر عشر كلمات فيها اللي هما: "وذلك وفقاً لأحكام الفقرة الأخيرة من المادة 189"

يعني مجلس الشعب والشورى الجايين لما يجتمعوا ان شاء الله وعشان يقدروا يقدموا طلب تعديل الدستور لازم بعض الشروط تتوافر والشروط دي مذكورة في المادة 189... بتقول ايه بقي المادة 189 ؟

المادة 189 بتقول : ولكل من رئيس الجمهورية وبعد موافقة مجلس الوزراء ولنصف أعضاء مجلسى الشعب والشورى طلب اصدار دستور جديد وتتولى جمعية تأسيسية من مائة عضو ينتخبهم أغلبية أعضاء المجلسين من غير المعينين فى إجتماع مشترك، إعداد مشروع الدستور فى موعد غايته ستة أشهر من تاريخ تشكيلها ويعرض رئيس الجمهورية المشروع خلال خمس عشرة يوماً من اعداده على الشعب لإستفتائه فى شأنه، ويعمل بالدستور من تاريخ إعلان موافقة الشعب عليه فى الاستفتاء.

ومعنى كده ان عشان مجلس الشعب والشوري يقدروا يطلبوا تعديل الدستور لازم يكون فيه طلب متقدم من نصف أعضاءهم... ولو ماتحققتش النسبة دي مش هايبقى فيه طلب تعديل دستور ومش هايبقى فيه دستور جديد...

يعني برضه المجلس الجاي مش ملزم يعدل الدستور الا اذا 50% من أعضاءه وافقوا على طلب التعديل ده... وفي ظل الانتخابات البرلمانية المبكرة (لو فرضنا انها هاتحصل في يونيه الجاي زي ما الجيش عايز) ماحدش ضامن تشكيل مجلس الشعب هايكون عامل ازاي ولا اذا كان هايتوافر عدد كافي في البرلمان يطلب التعديل ده... يعني كون ان احنا يبقى عندنا دستور معدل هايكون مرهون بنتائج الانتخابات البرلمانية... ودي مخاطرة.. لو انت موافق عليها قول "نعم" في الاستفتاء... لكن غيرك هايقول أنا ليه استنى نتائج البرلمانية طالما ممكن اعدل دستوري دلوقتي... وعشان كدة هايقول يوم 19 مارس "لا" للتعديلات الدستورية.

فيه ناس بقى بتقول ان المادة 189 مكرر بتحيل مجلس الشعب والشورى للفقرة الأخيرة بس من المادة 189... طيب سؤال بقى: أين تقع الحدود الجغرافية للفقرة الأخيرة من المادة 189 ؟؟

1- ناس تقول من اول " ويعرض رئيس الجمهورية المشروع خلال عشرة يوماً على الشعب ..."
2- وناس شايفة انها من أول "وتتولى جمعية تأسيسية من مائة عضو..."

وفي نفس الوقت المادة 189 نازلة كلها على بعضها براجراف واحد... طب أنا ايش ضمني بقى ان حد تالت غلس ومش عايز يعدل الدستور يجي يقولي ان الفقرة الأخيرة بتبتدي من اول "ولنصف أعضاء مجلس الشعب والشورى" ؟؟

في رأيي ان المادة 189 مكرر كان ممكن تتصاغ بشكل افضل من كده وتوفر علينا اللبس ده

ليه هاقول "لأ" على التعديلات الدستورية

يا مصر هانت وبانت

اللي عايزين يشيلوا شفيق: هي رخامة والسلام؟

مبدئيا وعشان نبقى واضحين... البوست ده مش هدفي منه اني أقنع حد بالنزول يوم الجمعة الجاية لميدان التحرير... الهدف من البوست ده شرح بعض النقاط اللي ممكن تكون غابت عن البعض وخلته مش فاهم ليه الناس عايزة تنزل تاني التحرير... بعد كده عايز تنزل انزل مش عايز تنزل براحتك ... المهم انك تعرف ان اللي نازلين التحرير بعد بكرة دول مش ناس غاوية رخامة والسلام أو انها ناس بتتظاهر لمجرد ان مش عاجبها سحنة شفيق أو حتى البلوفر بتاعه...



-أولاً : ليه مش عايزين شفيق ؟

- وهو احنا نعوز ليه واحد كان اختاره مبارك في فترة ما عشان يتكلم باسم النظام اللي كان ضد الثورة ... شفيق سياسياً بيمثل النظام القديم ومش مقبول انه بعد ما مشي نقبل احنا بتركته... معنى قبول شفيق لمنصب رئيس الوزرا في وقت مبارك هو انه قبل انه ياخد جانب النظام القديم واتحيز له بدل ما مثلاً يعتذر عن قبول المنصب بل ان شفيق جاء في فترة وكان المتحدث باسم النظام وبدأ يسفه ويسخر من الثوار (ودي تصريحاته ومسجلة) ده ناهيك عن انه غض البصر تماماً عن اعتقال عدد كبير من النشطاء أثناء توليه للوزارة وأثناء ما المظاهرات كانت شغالة وغضه البصر عن غلق مقرات والاستيلاء على أجهزة عدد من المراكز الحقوقية المحترمة زي المركز المصري للحقوق الاقتصادية والاجتماعية (اللي كان رفع قضية الحد الأدنى للأجور ضد مجلس الوزرا) ومركز هشام مبارك لحقوق الانسان... ده مذيعة قناة أجنبية كانت بتجري معاه حوار تليفوني بتسأله منين الرئيس بيتعهد باصلاحات وانتو بتعملوا الكلام ده عمل نفسه مش سامع أو مش فاهم وماردش على السؤال... حتى المذيعة سألته يا رئيس الوزرا يعني انت بقالك ربع ساعة بتتكلم معانا من غير مشاكل دلوقتي بس مابقتش سامعنا ؟



ثانياً: فيه ناس بتقول طب ما هو ممكن يكون مالوش ذنب انه جه في الظرف ده لكن هو راجل محترم وعمله في وزارة الطيران المدني مشهود له بالكفاءة...

- للناس دي هاقول ان كون فيه راجل اداري ناجح ده مش كافي عشان يبقى رئيس وزرا ... رئيس الوزرا اللي يعبر عن الثورة مطلوب منه أكتر من الإدارة... مطلوب منه يكون مؤمن بمبادئ الثورة والحكم الديمقراطي مش انه يكون مؤمن ان "مش من ثقافتنا انا نطلب من الرئيس يتنحى" زي ما شفيق صرح في أحد لقائاته بعد ما تولى رئاسة الوزرا... الناس اللي مؤمنة ان فيه شيئ في "ثقافتنا" يخلينا مانطالبش بكرامتنا ونرفض ونزيح الظلم لما يستشري مش هي اللي الثورة قامت عشان تجيبها ومش هي اللي الشهدا دفعوا حياتهم عشان هما يفضلوا في الحكم


ثالثاً: طيب سؤال ثالث عن "انه فرضنا ان الكلام ده مظبوط عن شفيق، مال باقي الوزرا في حكومته... عايزين تقيلوا الحكومة كلها ليه... وبعدين ماهو المجلس الأعلى للقوات المسلحة قال ان كده كده الحكومة دي هاتتغير قبل الانتخابات البرلمانية... يعني كلها شهر أو شهرين بالكتير ... مالكوا بقى متعفرتين ليه ؟

- تمام، ناخد بقى كل نقطة واحدة واحدة: الأول نتكلم في التحفظات اللي على باقي الوزرا وبعدين نتكلم عن خطة المجلس الأعلى للقوات المسلحة اللي اعلن عنها لتغيير الحكومة الحالية...

دلوقتي في الوزارة الحالية فيه 3 وزرا مغضوب عليهم:

أولاً وزير الداخلية لأنه في الحوار اللي أجراه مع عبد اللطيف المناوي رفض يعترف بأن وزارة الداخلية أخطأت في تعاملها مع الثوار بل وردد من تاني بعض الادعاءات ان فيه عناصر أجنبية كان ليها دور في الثورة دي (وانا طبعاً مش بجيب حاجة من عندي والحلقة متسجلة)... يبقى ده واحد أنا أعوزه في إيه ؟



تاني وزير مغضوب عليه هو أبو الغيط اللي برضه أثناء الثورة تطاول على الثوار ودافع عن النظام القديم ولسه بتاريخ 21 فبراير عامل حوار مع صحفيين أجانب مصورين فيها مكتبه وهو لسه معلق صورة الرئيس فوقيه ... (على فكرة بس، وزيرة خارجية فرنسا لسة مضطرة انها تستقيل من يومين عشان كانت متخذة موقف عدائي من الثورة في تونس ففضلوا الناس في فرنسا يهاجموها ويعايروها بموقفها المخزي ده لحد ما هي –وجايز لأن عندها دم- قدمت استقالتها ... وانتو عايزين ابو الغيط ياخد موقف عدائي من ثورتنا وبرضه يفضل مكانه... جايز... ده غير ان الفيديوهات اللي جاية من المصريين اللي كانوا في ليبيا وهربوا على تونس بتقول ان تعامل وزير الخارجية مع رعايا مصر بالخارج لسة زي ماهو ويشوبه الكثير من القصور وعدم الاكتراث

تالت وزير مغضوب عليه هو ممدوح مرعي وزير العدل اللي أي حد متابع للانتخابات ومجرياتها ومتابع لملف القضاء واستقلاليته يعرف ان ممدوح مرعي ده كان لازم يمشي امبارح قبل بكره...


- طيب المجلس الأعلى قال الحكومة دي مش هاتكون موجودة وقت الانتخابات البرلمانية، متعفرتين ليه بقى دلوقتي ؟
- عظيم جداً، الانتخابات البرلمانية دي كمان قد ايه.. الحقيقة ان ماحدش يعرف لأن دي حاجة لسة محل تفاوض ما بين الجيش والقوي السياسية المعارضة


- ليه هو مش الجيش قال الاستفتاء على الدستور في مارس والبرلمانية في يونيه والرئاسية في أغسطس ؟
- ده اللي قاله الجيش ... ودي الخطة اللي هو حاططها واللي أعلن عنها في بعض وسائل العلام ... لكن مطالب التجمعات اللي الجيش بيتحاور معاها حالياً زي ائتلاف شباب ثورة 25 يناير والبرادعي وعمرو موسي وكتير من المثقفين مختلفة تماما عن التصور ده وبتطرح تصور مغاير تماماً لطريقة سير الفترة الانتقالية .. والتصور ده مفاده الآتي:


-أولاً: تأجيل الانتخابات البرلمانية لأننا لو أجرينا انتخابات برلمانية في خلال الكام شهر اللي جايين، القوي السياسية مش هاتكون استعدت بما فيه الكفاية للتحضير للانتخابات... وعشان نكون دقيقين: مش هايكون جاهز للمعركة الانتخابية غير القوى السياسية اللي كان من قبل كده عندها هيكل تنظيمي منظم ومستقر يسمح لها بخوض الانتخابات وعشان مانطولش في النقطة دي مش هايكون جاهز غير فلول الحزب الوطني وبعض الاخوان ويبقى احنا كده رجعنا لنقطة الصفر ليس لشيئ إلا ان الجيش عايز يسلم السلطة للمدنيين بسرعة ويرجع لدورة العادي في خلال ست شهور... طب الحل ايه: ان الجيش يقعد أكتر ؟ لا ماحدش قال كده وعشان كده القوة المعارضة بتطالب بحاجة تانية



ثانياً: الحاجة التانية اللي بتطالب بيها القوى المعارضة هي انه يتم نقل السلطة من المجلس الأعلى للقوات المسلحة لمجلس رئاسي يضم مدنيين وبعض العسكر من أجل اتاحة وقت أطول للاستعداد للانتخابات البرلمانية.. والحقيقة ولأنه قد يختلف الناس على "مين اللي هايكون المجلس الرئاسي ده ومين اللي هايختاره" جه الاقتراح بأن الانتخابات الرئاسية تتم قبل البرلمانية عشان يتم اعطاء الفرصة للقوى السياسية انها تتحضر للانتخابات البرلمانية –اللي هايتم تنظيمها بعد الرئاسية بسنة أو أكتر- وعشان يتم تعديل قانون الأحزاب بحيث يسمح للقوى اللي عايزة تتواجد على الساحة انها تتواجد وتعلن عن نفسها وتبقى الانتخابات منافسة عادلة بينها مش بين رواسب النظام القديم...



ثالثاً: الحاجة التالتة اللي الناس بتقول عليها انه لو انتخبنا رئيس وقعدنا من غير مجلس شعب لمدة سنة وفي ظل الصلاحيات الكبيرة اللي بيديها الدستور الحالي للرئيس، فاحنا كده هانكون انتخبنا فرعون مش رئيس عشان مش هايكون فيه سلطة تشريعية تقف في وشه وتحاسبه لو أساء استخدام صلاحياته... فالاقتراح جه بأنه كمان يتم تعديل المواد الخاصة بصلاحيات الرئيس قبل انتخابه



طيب التصور ده معناه اننا في خلال العملية الانتقالية دي ومن هنا لحد ماتتم الانتخابات البرلمانية هانحتاج وزارة مكونة من خبرا محايدين أو وزارة تكنوقراط (يعني ماتجبش منير فخري عبد النور مثلاُ اللي هو مالوش في السياحة أصلاُ وتحطه وزير سياحة لمجرد انك تسد حنك حزب الوفد.. لأ تحط على كل وزارة حد فاهم في شغل الوزارة دي وخبير في مجاله) عشان يقدروا ياخدوا قرارات مصيرية في وزاراتهم مش يبقوا بس وزرا في حكومة تسيير أعمال...



بس كده وعشان الكلام اللي فات ده كله وعشان فيه ناس كتير مؤمنة بأن التصور بتاع قوى المعارضة (اللي بيقتضي وجود حكومة تكنوقراط ماكانتش في يوم معادية للثورة) عشان الناس دي مؤمنة بأن التصور ده أوقع من التصور بتاع المجلس الأعلى للقوات المسلحة (اللي يبدو وكأنه محاولة "لكروتة" المرحلة الانتقالية)، عشان كده الناس دي هاتتظاهر في التحرير ... لك ان تؤيدها وتنضم اليها ولك أن تتحفظ على دوافعها وتختلف معها لكن في الآخر لازم تفهم انها "مش عيال طالبة معاها رخامة والسلام"

الوسية

معرض تصوير فوتوغرافي لبنات مؤسسة بناتي 20-1-2011

تعلن مؤسسة بناتي (بنات الغد) عن إقامة معرض للتصوير الفوتوغرافي بعنوان "بنحلم ببكرة" يتم فيه عرض صور فوتوغرافية مأخوذة برؤية ومجهود بنات المؤسسة، وذلك يوم الخميس الموافق.20-1-2011

جدير بالذكر أن مؤسسة بناتي هي مؤسسة غير حكومية لخدمة الأطفال بلا مأوي والمعرضين للخطر. وقد تم ادخال نشاط التصوير الفوتوغرافي لبنات المؤسسة في إطار مشروع "سواسية للتعليم المبكر" التي تنفذه المؤسسة بتمويل من "مؤسسة ساويرس للتنمية الاجتماعية" بمنحة من شركة الأهرام للمشروبات.

وستتم إقامة المعرض في تمام الساعة السابعة مساءً بقاعة 9 بقصر الفنون بدار الأوبرا المصرية. وعلى الراغبين في الحضور الاتصال بالأرقام التالية:
0176703134 - 0113717975
أو مراسلة البريد الاكتروني التالي:
banatelghad@hotmail.com

الراغبين في حضور مؤتمر الطب النفسي لأطفال الشارع

لكل من يرغب في حضور مؤتمر الطب النفسي لأطفال الشارع يوم الأربعاء القادم بالجامعة الامريكية الدعوة عامة... كل ما عليكم هوالتوجه لأحد ادارات المتطوعين بفروع رسالة بالقاهرة لحجز دعوتكم واستلامها

او
ممكن تأكيد الحضور عن طريق الاتصال بالرقم التالي

Mob : 0197470422
E-mail : atfal_ad_elhaiah@yahoo.com

والجروب بتاع المؤتمر على الفيسبوك ممكن التواصل معاه ومع القائمين عليه من خلال الرابط ده
http://www.facebook.com/event.php?eid=180793218597395

المؤتمر ان شاء الله يبدأ الساعة 3 وينتهي الساعة 8 مساءً (حسب المكتوب على الجروب)

مؤتمر الطب النفسي لأطفال الشوارع

كتبت : رانيا علي فهمي
http://alnaharegypt.com/nhar/art25418-cat6.html

في إطار مشروع "أطفال قد الحياة" التابع لجمعية رسالة للأعمال الخيرية، الذي يهدف إلى الإهتمام برعاية أطفال الشوارع والأطفال المعرضين للانحراف والعمل على تأهيلهم حتى تتاح لهم الفرصة في حياة سوية وآمنة تعقد جمعية رسالة بالتعاون مع مشروع المجتمع المدنى المصرى " مجتمعنا " التابع لمركز كمال أدهم للصحافة والاعلام بالجامعة الأميريكية، مؤتمر الطب النفسي لأطفال الشوارع " المخاطر والحلول الممكنة "، بمشاركة أساتذة الطب النفسى المتخصصين فى مجال الطب النفسي للاطفال وكبار الشخصيات العامة، وذلك يوم الأربعاء 29 ديسمبر الجاري بقاعة ( ايوارت ) بالجامعة الأميريكية بميدان التحرير.

هذا وسيتم الإعلان خلال المؤتمر عن تأسيس العيادة النفسية بفروع أطفال قد الحياة لتأهيل الأطفال نفسيا، والذي يهدف إلى ان نصبح من اهم وانجح المراكز المتخصصة فى تأهيل اطفال الشوارع والأطفال المعرضين للأنحراف ومحاولة القضاء على هذه الظاهرة والعمل على علاج اسبابها عن طريغ برامج تأهيلية مناسبة .

كما يهدف مشروع " أطفال قد الحياة " إلى إعادة تأهيل اطفال الشوارع والأطفال المعرضين للأنحراف، من خلال تنفيذ برنامج تأهيلى يشمل كافة الجوانب اللازمة لتنشئة اطفال اسوياء ومنتجين ،ويتم تنفيذ البرنامج من خلال افراد مدربين وخبراء متخصصين وخطة عمل واضحة، وحماية أطفال الشوارع وتأهيلهم ودمجهم داخل طبقات المجتمع ، والتعاون مع المجموعات التطوعية والمؤسسات المتخصصة فى هذا المجال، ونشر الوعي بين طبقات المجتمع بأهمية القضاء على هذه الظاهرة، وتغيير نظرة المجتمع عن أطفال الشوارع بإعتبارهم ضحايا وليسوا مجرمين.

بالاضافة الى محاولة توفير مناخ أُسرى سوي للأطفال المفتقدين لهذا الشعور، وإدراج نشاط أطفال قد الحياة كنشاط أساسي داخل كل فروع جمعية رسالة للأعمال الخيرية، وإنشاء مركز متكامل لإستقبال وإقامة أطفال الشوارع والأطفال المعرضين للإنحراف والذي نأمل أن يكون من أهم مشروعات جمعية رسالة فى الفترة المقبلة،وإستغلال الموارد البشرية المتنامية داخل المجتمع المصرى وتوجيهها لحل مشاكل المجتمع وبناء الكوادر القادرة على تحمل المسؤلية والمشاركة فى صنع القرار .

The frontiers of trauma treatment

And here is another interesting 5-part webinar offering new clinical ideas in the field of trauma treatment. The webinar will be offered during the months of October and November and can be attended FOR FREE .... (or for 157$ for those who would like to participate in the discussions held by the psychotherapists).

Dates and the complete schedule of the 5-part webinar can be found here

Using Volunteers to expand NGO's services- Part 1

The webinar is currently available in different formats...
1- You can either watch it here
2- or see it as a PDF file by clicking here

3-or just listen to it as an mp3 by clicking here

And finally, this is just a small reminder that this free webinar is only the first part of a 4 parts webinar dealing with the same issue...

Part 2 was offered on Thursday Oct. 7th (yesterday) and is hopefully expected to be available in different formats very soon on the web. And for those of you who are interested in attending the two upcoming parts, their dates are Thursday oct. 21st and Thursday nov. 4th... Further details about how to register can be found here

An extremely interesting upcoming webinar for NGO's..

... especially those who are willing to make effective use of their volunteers

The Hidden Workforce Part 1: The Real Benefits of Using Volunteers... September 23rd

بناء قلعة على مساحة 20 فدانا لتصوير مسلسل "محمد علي باشا"...

وده في نفس البلد اللي أكتر من 45% من سكانه تحت خط الفقر

حاميها حراميها...

خبرين يفوروا الدم ويرفعوا الضغط وعلى رأي نوارة نجم، "كل ما يزيد الضغط، كل ما الثواب يكتر خاصة في رمضان" :-)

الخبر الأول عن الأزمة بين وزير الكهرباء ووزير البترول ... اللي خلاصته ان الكهرباء بتتقطع في مصر عشان وزارة البترول بدل ما تدي الغاز اللازم لوزارة الكهرباء بتروح تبيعه برخص التراب لاخواننا وولاد عمنا عشان يعرفوا يشوفوا في النور ... والمعلومة ممكن مايكونش فيها حاجة جديدة عشان الشعب مفروض يعني الـ default بتاعه انه يتفلق ... الجديد ان الـ default دلوقتي بتاع بعض الوزرا انهم مش بس يفلقوا الشعب لأ ده انهم كمان يفلقوا زمايلهم الوزرا والميس مش فاضية تتدخل ... الخبر أهو بيقول الري والكهربا طلعان عينهم هما الاتنين من 2004 والدنيا سايبة ومافيش حد يربي التلميذ المبلطج ولا حد يقوله ان الحقيبة اللي في ايده دي سلف مش ليه خالص خالص ... وان فيه بعض الحالات التانية اللي بتفصل فيها الميس لصالح التلميذ المبلطج زي في الحالة دي...

الخبر التاني مش خبر قد ماهو تغطية لخبر خروج الريان من السجن ولقاء عمرو أديب معاه عشان يحكي القصة من ناحيته... هاسيبكم تشوفوا الحوار... وكل واحد حر يبص للريان بطريقته بس انا شخصياً مش شايفة قدامي غير نموذج صارخ وحي على توظيف الاعلام لمدة 23 سنة في صناعة "شبح حرامي" للتمويه عن وجود حرامي أكبر..

الجزء الأول


الجزء التاني


الجزء التالت (الجزء ده مهم)


الجزء الرابع

نظام الأسر البديلة ونفسية الطفل... تأملات 2

زي ماحاولت أشرح في البوست اللي فات، نظام الأسر البديلة (اللي وزارة الدولة للأسرة والسكان عايزة تدخله مصر) من حيث المبدأ شئ جميل جداً وماحدش يقدر يعترض عليه ... بس مش بالشكل اللي هو عليه حالياً ومش بالعيوب اللي بتشوبه دلوقتي (واللي هابدأ اتعرضلها في البوست ده واللي بعده ان شاء الله) واللي ممكن في الآخر توصلنا لنتايج عكسية تماماً ... وخلونا نحكي النتايج العكسية دي ممكن تيجي ازاي من خلال الحكاية اللي هاحكيها عن تجربتي الشخصية مع حالة طفلة باتابعها داخل نظام الاسر البديلة...

مبدئياً، المنظمة اللي انا شغالة معاها فكرتها الأساسية هي التعامل مع عيوب نظام الأسر البديلة وتخفيف وطأته على الطفل لأنه لما بيتاخد من أهله، مش بس الأهل هما اللي بيتعاقبوا لأ هو كمان بتحصل في نفسيته وحياته أضرار غير قابلة للإصلاح irreversible damages ... المهم، بدأت شغلي معاهم بفترة تدريب مكثف لمدة شهر ونصف قبل مابقي حارس خاص معين من المحكمة لحماية الطفل ... (ومرة تانية باكرر استعدادي لتقديم النوع ده من التدريب المكثف للمتطوعين لأي جمعية في مصر بتشتغل مع أطفال الشوارع... ومش محتاجة أقول ان ده من غير أي مقابل لا مادي ولا عيني)

طيب، خلصت التدريب وحلفت اليمين قدام القاضي، وشوية واستلمت حالة لطفلة ماكملتش 9 سنين... سبب نقلها من أهلها ان نصهم سوابق والنص التاني تجار مخدرات ... عايزين بقي نلاقيلها أسرة بديلة... هايل، وفيه ناس كتير تتمني.. فين بقي المشكلة ... المشكلة انك نقلتها مرة من أهلها لدار اقامة مؤقتة = عقاب وضرر نفسي رقم 1 عشان الرسالة اللي بتوصللها ان أهلك يا بنتي دول حثالة يستاهلوا ياخدوا فوق دماغهم وانتي معاهم ... بعدين من دار الإقامة حد من قرايبها البعاد قرر يستضيفها = ضرر نفسي رقم 2 لأنها ماكانتش أصلاً على صلة كبيرة بقريبها ده ... بعدين الدنيا مامشيتش في بيت قريبها ده فاتنازل عنها (والطفل لما حد بيتنازل عنه، الرسالة اللي بتوصله هي انه يحس انه حته قماشة وسخة ماتستحقش غير انها تترمي في الزبالة) واتنقلت تاني لبيت تاني= ضرر نفسي 3... بعدين الدنيا مامشيتش تاني عشان البيت اللي راحته ماتأقلمش معاها فاتنازلوا عنها (ومرة تاني حد تاني بيقولها انت حتة قماشة وسخة حتي لو مش قصده يقوللها كده) = ضرر نفسي 4... وكل ده في أقل من 6 شهور... طبعاً طفل الشارع بيحصلله أكتر من كده ميت مرة مش بس في 6 شهور لأ ده ممكن في اليوم الواحد ... بس ليه مابقتش توجعه زي الأول ؟ عشان خلاص سمعها وحفظها ومر بالمرحلة دي من قبل كده...

وهو ده بالظبط اللي انا عايزة أوصله... ان البنت دي دلوقتي متشدد عليها الحراسة لأنها بتفكر جدياً في الهروب للشارع... يعني نظام الأسر البديلة بالوضع الحالي اللي هو عليه وبعيوبه وعدم وضعه لأي ضمانات تساعد على استقرار الطفل ساهم في انها تبقى مشروع طفل شارع... وساهم في نقل رسالة ما للبنت بأنها منبوذة وان الناس الوحيدين الكويسين في حياتها واللي بيحبوها -أو على الأقل اللي هي بتحبهم- هما الناس اللي قبل كده طفشوا ونزلوا الشارع (زي أمها، وناس تانية في حياتها وأسرتها هي بتعتبرهم مثل أعلى) ...

المهم ان الأسر البديلة اللي بتتنازل عن الطفل بعد فترة نسبتها مرتفعة جداً والحالة اللي معايا مش هي الوحيدة بل ان فيه حالة شهيرة جداً تصدرت أخبارها الصحف والإعلام الامريكي عن أسرة بديلة أمريكية اخدت طفل من روسيا وبعد فترة لما الدنيا مامشيتش حجزت له تذكرة طيران و"شحنته" زي البضاعة البايظة على روسيا ...

نهايته، أول عيب من عيوب نظام الأسر البديلة : ان تنقل الطفل المتكرر بين البيوت ودور الاقامة بيضيف عامل آخر لعدم استقراره النفسي وبيسببله نوع من أنواع الصدمات العصبية والنفسية اللي بتتكون مع مرور الوقت developmental trauma ... وعشان كده المفروض الطفل أول ما يتنقل من بيت لبيت لازم زي ما بيتعينله محامي وأخصائي اجتماعي يتعينله كمان أخصائي نفسي أو يتابع مع استشاري نفسي بصفة دورية لأن طول ما الطفل بيتنقل، طول مابتوصله رسايل مهينة حتى لو كانت غير مقصودة... رسايل ماحدش بيلقطها غيره لأنه في وضع هش جداً... وماحدش هايقدر يساعده يتخطاها غير استشاريي النفس والأخصائي النفسي...

نظام الأسر البديلة.. تأملات 1

ليه أطفال شوارع مابيعتبروش مشكلة في امريكا ؟ سؤال وجيه لما نلاقي ان فيه ناس بلا مأوي بس كلهم بالغين ومافيش بينهم اطفال شوارع... الموضوع ببساطة ان فئة الـ"بلا مأوي" ممنوع دخولها لمن هو دون الـ18 سنة بسبب نظام اسمه نظام الأسر البديلة... هايل جدا، نشوف نظام الأسر البديلة ده ولو هايخلصنا من أطفال الشارع في مصر يبقى ايه المانع...

نظام الأسر البديلة ده عبارة عن ان لو أسرة الطفل بتنتهك حقوقه (بتضربه، بتجوعه، بتعتدي عليه جنسياً، بتهمله، بتتاجر في الممنوع، بتتعاطي قدامه، بتسمحله يشوف مواد مش مسموح للي في سنه يشوفها... الخ... ودي معظمها من أسباب ظهور أطفال شوارع)، الطفل ده بيتاخد من أهله كنوع من العقوبة ليهم ويتحط مؤقتاً في عيلة بديلة لحد ما الأسرة الأصلية تتبع دورات تأهيلية وكورسات تعلمها انها تتعامل مع طفلها بصورة آدمية، وساعتها بس (لو الأسرة واظبت على حضور الدورات وأثبتت تحاليلها انها بتبعد عن الادمان في حالة ما اذا كانت مدمنة) بيرجع الطفل لأهله الأصليين... وكل ده بينظمه قانون بيحدد الآتي:

1. الظروف اللي يتاخد فيها الطفل من أسرته الأصلية
2. مواصفات الأسرة البديلة ومش بس كده لا ده كمان مواصفات السكن ومواصفات المنطقة السكنية
3. ظوابط ما ذا كان الطفل ده بينتمي للقبائل الأصلية في أمريكا (اللي احنا بنسميهم الهنود الحمر) بحيث مايتحطش في اسرة تبعده عن موروثه الثقافي ده
4. مدد زمنية معينة بين مرحلة التبليغ عن انتهاك حق الطفل وبين اتخاذ اجراء فعلي لحمايته، مدة زمنية محددة لعملية اعادة تأهيل الأبوين...
5. بعض المزايا اللي بتستفيد منها الأسر البديلة وبعض المساعدات المالية والعينية

قانون متظبط يعني ومحكم وفي بعض الأقوال... أوعى

طب ماتيالله نطبقه في مصر...

لأ استنوا شوية ... استنوا ماتعملوش زي اللائحة التنفيذية لقانون الطفل المصري (اللائحة التنفيذية لأي قانون مفروض بتنزل بعده بفتره قصيرة عشان القانون من غيرها بيفضل غير نافذ) اللي بعد سنتين من صدور القانون نفسه أخيراً صدرت وشابها عيبين من رأيي:

1. انها استوردت نظام الأسر البديلة بطريقة مبتشرة جداً أو بمعني أصح استوردت بس مصطلح الأسر البديلة كده ودخلته عنوة جوة القانون من غير ما تقول يعني ايه أسر بديلة ولا ازاي تتنظم ولا مين الاسر البديلة دي ولا ايه مواصفاتها ولا أي حاجة تانية من اللي موجود في نظام الأسر البديلة ... ويمكن ده مقصود كنوع من ادخال المصطلح على استحياء في وسط المجتمع قبل ما يتم ادخاله فيما بعد على شكل قانون ونظام متكامل... وده برضه مفهوم في ضوء ان ناس كتير ممكن تخلط مفهوم الأسر البديلة بالتبني ويتحول الموضوع لمعركة بين الحقوقيين وتيارات تانية طريفة أوي...
2. ان نظام الأسر البديلة حاجة والتطبيق حاجة تانية خالص... وعند التطبيق بتبان عيوب كتير للنظام... والنظام حقيقةً بتشوبه عيوب كتير وده عن تجربة وبصفتي واحدة من الحرس الخاص المعين من القضاء الأمريكي لأطفال الأسر البديلة ... وعشان كده البوست الجاي ان شاء الله أحكي عن التجربة دي... تجربة طفلة حقيقية بين طرقات النظام ده وغياهبه... تجربة هاترجعني تاني لفكرة "ارع طفل... فكرة متربة ومحتاجة تتلمع"

قصة قصيرة.. بس مش جديدة

وهو أطفال الشارع بيتولدوا من قليل