الأربعاء، 2 مارس، 2011

اللي عايزين يشيلوا شفيق: هي رخامة والسلام؟

مبدئيا وعشان نبقى واضحين... البوست ده مش هدفي منه اني أقنع حد بالنزول يوم الجمعة الجاية لميدان التحرير... الهدف من البوست ده شرح بعض النقاط اللي ممكن تكون غابت عن البعض وخلته مش فاهم ليه الناس عايزة تنزل تاني التحرير... بعد كده عايز تنزل انزل مش عايز تنزل براحتك ... المهم انك تعرف ان اللي نازلين التحرير بعد بكرة دول مش ناس غاوية رخامة والسلام أو انها ناس بتتظاهر لمجرد ان مش عاجبها سحنة شفيق أو حتى البلوفر بتاعه...



-أولاً : ليه مش عايزين شفيق ؟

- وهو احنا نعوز ليه واحد كان اختاره مبارك في فترة ما عشان يتكلم باسم النظام اللي كان ضد الثورة ... شفيق سياسياً بيمثل النظام القديم ومش مقبول انه بعد ما مشي نقبل احنا بتركته... معنى قبول شفيق لمنصب رئيس الوزرا في وقت مبارك هو انه قبل انه ياخد جانب النظام القديم واتحيز له بدل ما مثلاً يعتذر عن قبول المنصب بل ان شفيق جاء في فترة وكان المتحدث باسم النظام وبدأ يسفه ويسخر من الثوار (ودي تصريحاته ومسجلة) ده ناهيك عن انه غض البصر تماماً عن اعتقال عدد كبير من النشطاء أثناء توليه للوزارة وأثناء ما المظاهرات كانت شغالة وغضه البصر عن غلق مقرات والاستيلاء على أجهزة عدد من المراكز الحقوقية المحترمة زي المركز المصري للحقوق الاقتصادية والاجتماعية (اللي كان رفع قضية الحد الأدنى للأجور ضد مجلس الوزرا) ومركز هشام مبارك لحقوق الانسان... ده مذيعة قناة أجنبية كانت بتجري معاه حوار تليفوني بتسأله منين الرئيس بيتعهد باصلاحات وانتو بتعملوا الكلام ده عمل نفسه مش سامع أو مش فاهم وماردش على السؤال... حتى المذيعة سألته يا رئيس الوزرا يعني انت بقالك ربع ساعة بتتكلم معانا من غير مشاكل دلوقتي بس مابقتش سامعنا ؟



ثانياً: فيه ناس بتقول طب ما هو ممكن يكون مالوش ذنب انه جه في الظرف ده لكن هو راجل محترم وعمله في وزارة الطيران المدني مشهود له بالكفاءة...

- للناس دي هاقول ان كون فيه راجل اداري ناجح ده مش كافي عشان يبقى رئيس وزرا ... رئيس الوزرا اللي يعبر عن الثورة مطلوب منه أكتر من الإدارة... مطلوب منه يكون مؤمن بمبادئ الثورة والحكم الديمقراطي مش انه يكون مؤمن ان "مش من ثقافتنا انا نطلب من الرئيس يتنحى" زي ما شفيق صرح في أحد لقائاته بعد ما تولى رئاسة الوزرا... الناس اللي مؤمنة ان فيه شيئ في "ثقافتنا" يخلينا مانطالبش بكرامتنا ونرفض ونزيح الظلم لما يستشري مش هي اللي الثورة قامت عشان تجيبها ومش هي اللي الشهدا دفعوا حياتهم عشان هما يفضلوا في الحكم


ثالثاً: طيب سؤال ثالث عن "انه فرضنا ان الكلام ده مظبوط عن شفيق، مال باقي الوزرا في حكومته... عايزين تقيلوا الحكومة كلها ليه... وبعدين ماهو المجلس الأعلى للقوات المسلحة قال ان كده كده الحكومة دي هاتتغير قبل الانتخابات البرلمانية... يعني كلها شهر أو شهرين بالكتير ... مالكوا بقى متعفرتين ليه ؟

- تمام، ناخد بقى كل نقطة واحدة واحدة: الأول نتكلم في التحفظات اللي على باقي الوزرا وبعدين نتكلم عن خطة المجلس الأعلى للقوات المسلحة اللي اعلن عنها لتغيير الحكومة الحالية...

دلوقتي في الوزارة الحالية فيه 3 وزرا مغضوب عليهم:


أولاً وزير الداخلية لأنه في الحوار اللي أجراه مع عبد اللطيف المناوي رفض يعترف بأن وزارة الداخلية أخطأت في تعاملها مع الثوار بل وردد من تاني بعض الادعاءات ان فيه عناصر أجنبية كان ليها دور في الثورة دي (وانا طبعاً مش بجيب حاجة من عندي والحلقة متسجلة)... يبقى ده واحد أنا أعوزه في إيه ؟



تاني وزير مغضوب عليه هو أبو الغيط اللي برضه أثناء الثورة تطاول على الثوار ودافع عن النظام القديم ولسه بتاريخ 21 فبراير عامل حوار مع صحفيين أجانب مصورين فيها مكتبه وهو لسه معلق صورة الرئيس فوقيه ... (على فكرة بس، وزيرة خارجية فرنسا لسة مضطرة انها تستقيل من يومين عشان كانت متخذة موقف عدائي من الثورة في تونس ففضلوا الناس في فرنسا يهاجموها ويعايروها بموقفها المخزي ده لحد ما هي –وجايز لأن عندها دم- قدمت استقالتها ... وانتو عايزين ابو الغيط ياخد موقف عدائي من ثورتنا وبرضه يفضل مكانه... جايز... ده غير ان الفيديوهات اللي جاية من المصريين اللي كانوا في ليبيا وهربوا على تونس بتقول ان تعامل وزير الخارجية مع رعايا مصر بالخارج لسة زي ماهو ويشوبه الكثير من القصور وعدم الاكتراث

تالت وزير مغضوب عليه هو ممدوح مرعي وزير العدل اللي أي حد متابع للانتخابات ومجرياتها ومتابع لملف القضاء واستقلاليته يعرف ان ممدوح مرعي ده كان لازم يمشي امبارح قبل بكره...


- طيب المجلس الأعلى قال الحكومة دي مش هاتكون موجودة وقت الانتخابات البرلمانية، متعفرتين ليه بقى دلوقتي ؟
- عظيم جداً، الانتخابات البرلمانية دي كمان قد ايه.. الحقيقة ان ماحدش يعرف لأن دي حاجة لسة محل تفاوض ما بين الجيش والقوي السياسية المعارضة


- ليه هو مش الجيش قال الاستفتاء على الدستور في مارس والبرلمانية في يونيه والرئاسية في أغسطس ؟
- ده اللي قاله الجيش ... ودي الخطة اللي هو حاططها واللي أعلن عنها في بعض وسائل العلام ... لكن مطالب التجمعات اللي الجيش بيتحاور معاها حالياً زي ائتلاف شباب ثورة 25 يناير والبرادعي وعمرو موسي وكتير من المثقفين مختلفة تماما عن التصور ده وبتطرح تصور مغاير تماماً لطريقة سير الفترة الانتقالية .. والتصور ده مفاده الآتي:


-أولاً: تأجيل الانتخابات البرلمانية لأننا لو أجرينا انتخابات برلمانية في خلال الكام شهر اللي جايين، القوي السياسية مش هاتكون استعدت بما فيه الكفاية للتحضير للانتخابات... وعشان نكون دقيقين: مش هايكون جاهز للمعركة الانتخابية غير القوى السياسية اللي كان من قبل كده عندها هيكل تنظيمي منظم ومستقر يسمح لها بخوض الانتخابات وعشان مانطولش في النقطة دي مش هايكون جاهز غير فلول الحزب الوطني وبعض الاخوان ويبقى احنا كده رجعنا لنقطة الصفر ليس لشيئ إلا ان الجيش عايز يسلم السلطة للمدنيين بسرعة ويرجع لدورة العادي في خلال ست شهور... طب الحل ايه: ان الجيش يقعد أكتر ؟ لا ماحدش قال كده وعشان كده القوة المعارضة بتطالب بحاجة تانية



ثانياً: الحاجة التانية اللي بتطالب بيها القوى المعارضة هي انه يتم نقل السلطة من المجلس الأعلى للقوات المسلحة لمجلس رئاسي يضم مدنيين وبعض العسكر من أجل اتاحة وقت أطول للاستعداد للانتخابات البرلمانية.. والحقيقة ولأنه قد يختلف الناس على "مين اللي هايكون المجلس الرئاسي ده ومين اللي هايختاره" جه الاقتراح بأن الانتخابات الرئاسية تتم قبل البرلمانية عشان يتم اعطاء الفرصة للقوى السياسية انها تتحضر للانتخابات البرلمانية –اللي هايتم تنظيمها بعد الرئاسية بسنة أو أكتر- وعشان يتم تعديل قانون الأحزاب بحيث يسمح للقوى اللي عايزة تتواجد على الساحة انها تتواجد وتعلن عن نفسها وتبقى الانتخابات منافسة عادلة بينها مش بين رواسب النظام القديم...



ثالثاً: الحاجة التالتة اللي الناس بتقول عليها انه لو انتخبنا رئيس وقعدنا من غير مجلس شعب لمدة سنة وفي ظل الصلاحيات الكبيرة اللي بيديها الدستور الحالي للرئيس، فاحنا كده هانكون انتخبنا فرعون مش رئيس عشان مش هايكون فيه سلطة تشريعية تقف في وشه وتحاسبه لو أساء استخدام صلاحياته... فالاقتراح جه بأنه كمان يتم تعديل المواد الخاصة بصلاحيات الرئيس قبل انتخابه



طيب التصور ده معناه اننا في خلال العملية الانتقالية دي ومن هنا لحد ماتتم الانتخابات البرلمانية هانحتاج وزارة مكونة من خبرا محايدين أو وزارة تكنوقراط (يعني ماتجبش منير فخري عبد النور مثلاُ اللي هو مالوش في السياحة أصلاُ وتحطه وزير سياحة لمجرد انك تسد حنك حزب الوفد.. لأ تحط على كل وزارة حد فاهم في شغل الوزارة دي وخبير في مجاله) عشان يقدروا ياخدوا قرارات مصيرية في وزاراتهم مش يبقوا بس وزرا في حكومة تسيير أعمال...



بس كده وعشان الكلام اللي فات ده كله وعشان فيه ناس كتير مؤمنة بأن التصور بتاع قوى المعارضة (اللي بيقتضي وجود حكومة تكنوقراط ماكانتش في يوم معادية للثورة) عشان الناس دي مؤمنة بأن التصور ده أوقع من التصور بتاع المجلس الأعلى للقوات المسلحة (اللي يبدو وكأنه محاولة "لكروتة" المرحلة الانتقالية)، عشان كده الناس دي هاتتظاهر في التحرير ... لك ان تؤيدها وتنضم اليها ولك أن تتحفظ على دوافعها وتختلف معها لكن في الآخر لازم تفهم انها "مش عيال طالبة معاها رخامة والسلام"


هناك 3 تعليقات:

  1. الأهرام: إتهامات بالجمله لشفيق بإهدار المال العام ومحاباة اولاد الرئيس المخلوع

    12/03/2011
    تقدم عدد من العاملين بوزارة الطيران المدني والشركة القابضة لمصر للطيران اليوم بـ 24 بلاغا إلى النائب العام يتهمون فيه الفريق أحمد شفيق رئيس مجلس الوزراء ووزير الطيران السابق بإهدار المال العام ، ومحاباة علاء وجمال مبارك في شركة موفنبيك و قيامه بإسناد عملية إنشاء مبنى الركاب الجديد رقم 3 بمطار القاهرة إلى شركات تابعة لمجدي راسخ ومحمود الجمال ولبعض أصدقائه بالأمر المباشر وبأرقام فلكية، حيث بلغت تكلفة المبنى 3,3مليار بقروض من البنك الدولي.
    كما قدم العاملون حافظة بالمستندات والوثائق التى تؤيد وجهة نظرهم وتضمنت 24 بلاغًا جاءت كالتالي :
    1- قام أحمد شفيق بإسناد عملية إنشاء مبنى الركاب الجديد رقم 3 بمطار القاهرة إلي شركات تابعة لمجدي راسخ ومحمود الجمال ولبعض أصدقائه بالأمر المباشر وبأرقام فلكية حيث بلغت تكلفة المبنى 3,3مليار بقروض من البنك الدولي .
    2 - بلغت خسائر تشغيل مبنى الركاب رقم 3 أكثر من 500 مليون جنيه سنويا.
    3- الشركة التي أشرفت علي إنشاء المبنى رقم 3 وهي تاس التركية قامت بإنشاء مطار أتاتورك بتركيا وهو يمثل ثلاثة أضعاف مطار القاهرة بدون قروض بنظام "p.o.t " لمدة محددة ودون تحميل الدولة التركية أية أعباء أو خسائر.
    4-قام أحمد شفيق ببيع 500 ألف متر مربع من الأراضي الواقعة في زمام وزارة الطيران المدني لرجل الأعمال فهد الشبكشي بسعر جنيه واحد للمتر المربع وكذلك باع 4000 متر مربع لشركة مارسيم العالمية لبناء فندق بالمطار الجديد بالأمر المباشر وبدون مناقصة بسعر جنيه واحد للمتر المربع وهذا الفندق يمتلك فهد الشبكشي 50% من حصته .
    5

    ردحذف
  2. -قام أحمد شفيق بتقديم مليون متر مربع لوجدي كرارة برسم إشغال واحد جنيه شهريا في زمام وزارة الطيران المدني .
    6-بصفته رئيس أمناء مارينا قام شفيق بمنح حق استغلال فندقين بمارينا لوجدي كرارة أيضا مقابل مليون حنيه سنويا رغم أن الفندقين يحققان أرباحا ً تتراوح مابين 50 إلي 60 مليون جنيه سنويا ً.
    7- قام أحمد شفيق ببيع الطائرات المملوكة لمصر للطيران بنظام الشراء التشغيلي ومرهونة بأصول مصر
    8- قام بإدراج قيمة الطائرات علي إنها إيرادات للتغطية على خسائر الشركات التابعة لمصر للطيران وعلي سبيل المثال شركة الخطوط الجوية بلغت خسائرها 580مليون جنيه العام الماضي.
    9-قام أحمد شفيق ببناء ممر رابع وبرج مراقبة جديد بمطار القاهرة بتكلفة مليار و 250 مليون جنيه بالرغم من وجود ثلاثة ممرات وبرج مراقبة مع أن كثافة حركة الطيران بمطار القاهرة لا تستدعي هذه الإنشاءات التي تعد إهدارا ً للمال العام وعلي سبيل المثال فمطار هيثرو بلندن به ممران فقط رغم أن كثافة حركة الطيران به تبلغ خمسة أضعاف كثافة الطيران في مطار القاهرة.
    10- قام أحمد شفيق ببناء "مول تجاري"أمام صالة الوصول رقم 3 بالمطار القديم بتكلفة 100 مليون جنيه ولم يحقق أية إيرادات وفشل المشروع في مطار شرم الشيخ وأنشأ مولا تجاريا بتكلفة 40 مليون جنيه وتم تحويله إلي مخزن تجميع عفش الركاب ويتم الآن إنشاء مترو طائر يربط بين مطار رقم 1ومطار 3 بتكلفة 250 مليون رغم أن حركة ركاب الترانزيت والمسافة بين المبنيين لا تستدعي هذا الإهدار للمال العام حيث تم الايحاء من شركات عالمية غير متخصصة بإمكانية تحويل مطار القاهرة إلي مطار محوري .
    11 -يمتلك أحمد شفيق قصرا ًفي التجمع الخامس وقصرا ًآخر فى مارينا تم تخصيصهما له من محمد إبراهيم سليمان وزير الإسكان الأسبق وكذلك قصر فى باريس وقام بإنشاء طريق بين التجمع الخامس والمطار لخدمة سيادته بحجة خدمة الركاب القادمين من التجمع الخامس والمدن الجديدة بتكلفة 120مليون جنيه والطريق خال تماماً طوال 24 ساعة
    12 - قام أحمد شفيق بتعيين أكثر من 600 لواء وعميد متقاعد فى وزارة الطيران بلغت مرتباتهم الشهرية نحو 9 ملايين جنيه
    13 -قام بنقل 3 من أصدقائه المقربين للعمل كمديرين لمكاتب مصر للطيران فى الخارج وهم محمد الكردى مدير مكتبه وعبد الحميد شلبى لواء قوات جوية ومدير الأمن بوزارة الطيران وأحمد البلتاجى الملحق العسكرى بفرنسا ووصل مرتب كل منهم الى 20 ألف يورو شهرياً
    14 - قامت مصر للطيران بتعليمات من أحمد شفيق بإلغاء عقد شركة مالى جيم الألمانية التى تم إرساء عقد إدارة فندق موفنبيك المطار والذى تساهم فيه مصر للطيران بنسبة 50% ودفعت مصر للطيران للشريك السعودى 4,2 مليون يورو كغرامة فسخ عقد وتم إعادة الإدارة إلى شركة موفنبيك لأن علاء وجمال مبارك شريكان فى شركة موفنبيك لإدارة الفنادق .
    15 -وافقت سلطة الطيران المدنى المصرى لشركة مالى كوبر الإنجليزية على إنشاء مطار فى منطقة رأس سدر بنظام p.o.t ولكن لدواعى أمنية تم إلغاء المشروع ورفض أحمد شفيق دفع 5 ملايين جنيه غرامة تعويض للشركة وبعد جلسات تحكيم دولى طلبت الشركة مبلغ 50 مليون جنيه الحد الأقصى كتعويض تم تخصيص المبلغ إلى 15 مليون دولار تم دفعه بالكامل وأشيع فى ذلك الوقت أن الحكم قد تم الغاؤه وهذا غير صحيح .
    16 - صندوق تطوير وتنمية الطيران رأس ماله يتراوح بين 200 الى 300 مليون جنيه يتم التصرف فيه عبر أحمد شفيق شخصياً وبدون أيه جهه رقابية .
    17 -تم بيع طائرتى مصر للطيران الجامبوالعملاقة بمبلغ 2 مليون جنيه وهذا المبلغ لايساوى ثمن محرك للطائرتين .
    18 - مستشفى مصر للطيران تم بناؤه بمجهود العاملين فى مصر للطيران وتم تحويلة بأمر من شفيق إلى مستشفى عام للشركات والفنانين وتم عزل موظفى مصر للطيران فى مبنى صغير وأصبحوا غرباء داخل مستشفاهم.

    ردحذف
  3. 19 -تم إسناد إدارة مستشفى مصر للطيران للواء عبد السلام حلمى وهو ليس طبيباً ولكن مهندس حفلات أحمد شفيق والذى عمل دعاية لحفل الشركة بين مستشفى مصر للطيران ومستشفى جورج بومبيرو الفرنسية وتم الاستعانه بشركة دعاية وتكلف الحفل مبالغ خيالية .
    - إن سياسة أحمد شفيق وهتلر طنطاوى ووزير العدل ممدوح مرعى أدت إلى تكميم الأفواه وتشويه سمعة الشرفاء وتلفيق الاتهامات حتى وصلت الأمور إلى مهاجمة منازل الشرفاء فى منتصف الليل وحبسهم فى مبنى الرقابة الإدارية.
    20 -المهندس عاطف عبد الحميد وزير النقل الحالى كان يشغل منصب رئيس الشركة القابضة لمصر للطيران وتم عزله بأوامر رئاسية عليا لتقاضية عمولات .. واستعان به أحمد شفيق كوزير للنقل فى وزارته.
    21-اللواء إبراهيم مناع رئيس الشركة القابضة للمطارات والملاحة الجوية وشريك أحمد شفيق فى عمليات إنشاء المطارات تم الاستعانة به كوزير للطيران فى حكومة شفيق للتغطية على الأخطاء وإهدار المال العام.
    22- تم إنشاء نادى للنشاط الرياضى للعاملين بوزارة الطيران وهيئه ميناء القاهرة الجوى وتخصيص 6,5 مليون من شركة الخطوط الجوية بمصر للطيران ومع ذلك غير مسموح لموظفى شركة الخطوط الجوية بدخول النادى قبل دفع رسم اشتراك 30 ألف جنيه ورسم سنوى.
    23 - يوجد ماكينة لطبع تذاكر السفر بمكتب الوزير السابق أحمد شفيق وهي مخالفة مالية جسيمة وإهدار للمال العام لانه لايمكن مراقبة المبالغ المحصلة من استخراج هذه التذاكر.
    24 -قام أحمد شفيق بتخصيص الأرض الواقعة على طريق المطار خلف لابوار لابن أحد المسئولين والذى أقام عليه مدينة ترفيهية تم تخصيص هذه الأرض بسعر جنيه للمتر

    ردحذف