الجمعة، 11 مارس 2011

بخصوص كون المادة 189 مكرر ملزمة للبرلمان بوضع دستور جديد


فيه ناس بتقول ان التعديلات الدستورية وبالتحديد المادة 189 مكرر بتلزم مجلس الشعب والشورى الجايين انهم يجتمعوا ويعملوا جمعية تأسيسية تحط دستور من أول وجديد وده لأن نص المادة 189 مكرر بيقول الآتي:

يجتمع الاعضاء غير المعينين لأول مجلسى شعب وشورى تاليين لإعلان نتيجة الأستفتاء على تعديل الدستور لأختيار الجمعية التأسيسية المنوط بها إعداد مشروع الدستور الجديد خلال ستة اشهر من انتخابهم وذلك كله وفقاً لأحكام الفقرة الأخيرة من المادة 189.

جميل جداً... الفقرة دي ممكن تدينا ايحاء بانها بتلزم مجلس الشعب والشورى الجايين بأنهم يحطوا دستور حديد لكن في الحقيقة ان المادة دي برضه مش ملزمة ... ليه؟

عشان آخر عشر كلمات فيها اللي هما: "وذلك وفقاً لأحكام الفقرة الأخيرة من المادة 189"

يعني مجلس الشعب والشورى الجايين لما يجتمعوا ان شاء الله وعشان يقدروا يقدموا طلب تعديل الدستور لازم بعض الشروط تتوافر والشروط دي مذكورة في المادة 189... بتقول ايه بقي المادة 189 ؟

المادة 189 بتقول : ولكل من رئيس الجمهورية وبعد موافقة مجلس الوزراء ولنصف أعضاء مجلسى الشعب والشورى طلب اصدار دستور جديد وتتولى جمعية تأسيسية من مائة عضو ينتخبهم أغلبية أعضاء المجلسين من غير المعينين فى إجتماع مشترك، إعداد مشروع الدستور فى موعد غايته ستة أشهر من تاريخ تشكيلها ويعرض رئيس الجمهورية المشروع خلال خمس عشرة يوماً من اعداده على الشعب لإستفتائه فى شأنه، ويعمل بالدستور من تاريخ إعلان موافقة الشعب عليه فى الاستفتاء.

ومعنى كده ان عشان مجلس الشعب والشوري يقدروا يطلبوا تعديل الدستور لازم يكون فيه طلب متقدم من نصف أعضاءهم... ولو ماتحققتش النسبة دي مش هايبقى فيه طلب تعديل دستور ومش هايبقى فيه دستور جديد...

يعني برضه المجلس الجاي مش ملزم يعدل الدستور الا اذا 50% من أعضاءه وافقوا على طلب التعديل ده... وفي ظل الانتخابات البرلمانية المبكرة (لو فرضنا انها هاتحصل في يونيه الجاي زي ما الجيش عايز) ماحدش ضامن تشكيل مجلس الشعب هايكون عامل ازاي ولا اذا كان هايتوافر عدد كافي في البرلمان يطلب التعديل ده... يعني كون ان احنا يبقى عندنا دستور معدل هايكون مرهون بنتائج الانتخابات البرلمانية... ودي مخاطرة.. لو انت موافق عليها قول "نعم" في الاستفتاء... لكن غيرك هايقول أنا ليه استنى نتائج البرلمانية طالما ممكن اعدل دستوري دلوقتي... وعشان كدة هايقول يوم 19 مارس "لا" للتعديلات الدستورية.


فيه ناس بقى بتقول ان المادة 189 مكرر بتحيل مجلس الشعب والشورى للفقرة الأخيرة بس من المادة 189... طيب سؤال بقى: أين تقع الحدود الجغرافية للفقرة الأخيرة من المادة 189 ؟؟

1- ناس تقول من اول " ويعرض رئيس الجمهورية المشروع خلال عشرة يوماً على الشعب ..."
2- وناس شايفة انها من أول "وتتولى جمعية تأسيسية من مائة عضو..."

وفي نفس الوقت المادة 189 نازلة كلها على بعضها براجراف واحد... طب أنا ايش ضمني بقى ان حد تالت غلس ومش عايز يعدل الدستور يجي يقولي ان الفقرة الأخيرة بتبتدي من اول "ولنصف أعضاء مجلس الشعب والشورى" ؟؟

في رأيي ان المادة 189 مكرر كان ممكن تتصاغ بشكل افضل من كده وتوفر علينا اللبس ده

هناك 26 تعليقًا:

  1. حرام عليك ياراجل اسمع حلقة صبحى صالح على التلفزيون وطارق البشرى او اى قانونى هيقول الكلام ده مش مظبوط

    ثم فين البديل اللى مايطولش فترة الجيش

    ردحذف
  2. أولا مع إحترامى الكامل للأستاذ طارق البشرى والأستاذ صبحى صالح لكن أنا أسمع رأى حد محايد وكان شايف الموضوع من بره مش رأى حد كان مشارك ولازم يدافع عن تعديلاته ولغاية دلوقتى الأغلبية العظمى من الدستوريين والقانونيين ضد التعديلات دى أما عن البديل فهو المجلس الرئاسى وبه واحد عسكرى وعلى فكره وجود الجيش فى الشارع مرتبط بالأمن يعنى الأمن يرجع الجيش ينسحب علطول ويرجع ثكناته ..

    ردحذف
  3. طيب احنا ممكن نوافق على التعديلات عشان البلد تستقر شوية و لو مجلس الشعب معملش دستور جديد نروح نشيلهم و نقفل لهم المجلس زي ما شيلنا الريس و التحرير موجود..

    ردحذف
  4. ولماذا لا نقوم الان بوضع دستور جديد وننتهي من هذا العبء لماذا ننتظر إنتخابات مجلسي شعب وشوري ورئيس وفي النهاية ممكن يطبخوها مع بعض وكإنك يابو زيد ماغزيت

    ردحذف
  5. لا يا فندم المادة ملزمة لانها مادة استثنائية ولن تستخدم الا في هذه الفترة فقط ولا ينطبق عليها الاشنراطات التي نص عليها في المادة 189 حتى يتم تطبيقها الان من دون وجود رئيس جمهورية ودي طبيعة المواد الاستثنائية الموجود للفترات الانتقالية
    والا فلماذا وضعت هذه المادة طالما انها لا تختلف في شيء عن المادة 189

    ردحذف
  6. البديل هو المجلس الرئاسي
    وبعدين هو الدستور الجديد صعب
    ما كلية الحقوق جامعة القاهرة كتبوا دستور في وقت اقل من بتاع التعديﻻت
    ايه المشكلة لما يكون المجلس اللي هيعمل الدستور 200 فرد لو انتوا شايفين انه مهمة صعبة
    طب ما تونس عملت جمعية تأسيسية للدستور وبتقر دستور اهه وهيحصل عليه استفتاء
    بﻻش دي مجلس رئاسي ووثيقة دستورية
    مجلس رئاسي والاعﻻن العالمي لحقوق الانسان كدستور مؤقت

    ردحذف
  7. أحمد خالد.. مافيش حاجة بتقول في التعديل انها مادة استثنائية ولا ينطبق عليها الاشتراطات بتاعة المادة 189 ... دي حتي يتقول ان اجتماع المجلس الجاي على طول دخ من أجل وضع جمعية تأسيسية لازم يلتزم بالشروط الموضوعة في المادة 189 وده بالنص الأتي:" وذلك وفقاً لأحكام الفقرة الأخيرة من المادة 189".... شوف أهو لو ماكانتش العشر كلمات دي موجودة كنت هاقولك هاصوت ب"نعم" على الدستور

    ردحذف
  8. المادة 189 مكرر تحيل إلى الفقرة الأخيرة من المادة 189 يعني الجزء المتعلق بتشكيل اللجنة ومدة عملها. وليس باختيار الرئيس أو نصف مجلس الشعب.
    فأشار إلى الفقرة وليس للمادة كاملة.

    "وتتولى جمعية تأسيسية من مائة عضو ينتخبهم أغلبية أعضاء المجلسين من غير المعينين فى إجتماع مشترك، إعداد مشروع الدستور فى موعد غايته ستة أشهر من تاريخ تشكيلها ويعرض رئيس الجمهورية المشروع خلال خمس عشرة يوماً من اعداده على الشعب لإستفتائه فى شأنه، ويعمل بالدستور من تاريخ إعلان موافقة الشعب عليه فى الاستفتاء"

    فالتعديلات تفرض على المجلس اختيار هذه اللجنة لإعداد الدستور الجديد.

    ردحذف
  9. اولا انا مش قانونى بس من قرائى للماده فهمت ان المجلس الى جى ملزم بتعين لجنه لعمل دستور جديد لان ده من المواد الى بيسموها مواد انتقاليه او مرحليه
    زى ماده 190 الى كلو اعد زى الاهبل يكتبها و يرددتها ان الرئيس االحالى تنتهى مده رئاسيه بعد انتهاء ست سنوات كله اعد يكتبها و يعد و يزيد فيها
    و بنى كل واحد يتلهى و يخليه فى حاله و فى شغاله و احنا مهما طلعنا ولا نزلنا من هنسلك مع الناس ده لاننا مش دستورين
    احنا هنوافق لثقتنا فيهم و انهم مش واهم مصلحه و لا محسوبين على حد
    ده خلاصه الكلام

    ردحذف
  10. اه الى بيتكلم على تونس
    يونس يا بابا يا نايم فى العسل عندها المجالس النيابيه قائمه لسه يعنى مجلس الشعب فى تونس شغال متحلش فى فرق

    ردحذف
  11. و ايه ضمانك انهم هيعملو دستور جديد لو قولنا لا
    مش يمكن يقولك هنعمل اعلان دستور موقت تانى فى حين
    انت هيكون معاك فعلا اعلان دستورى لو قولت اه

    ردحذف
  12. hmadani

    بس انا مش شايفة ان المادة 189 متقسمة لفقرات بحيث انك تقول ان 189 مكرر بتشير للفقرة التانية بس من 189 ومش للفقرة الأولي اللي فيها شرط الـ 50% من أعضاء مجلس الشعب...

    انا اللي شايفاه ان 189 كلها على بعضها فقرة واحدة.

    ردحذف
  13. يا جمااااااااااااااااااعة بنقول الإلزام هنا بيشير إلى الفقرة الأخيرة من المادة 189 مش كل المادة 189 فوالنبي كل واحد يبطل فلسفة
    وقل لمن يدعى فى العلم فلسفة عرفت شيئا وغابت عنك أشياء
    اللى بيتكلم كان أحسن اتفرج على صبحى صالح وعاطف البنا وطارق البشري عشان يشيل الالتباس اللى فى دماغه ده

    ردحذف
  14. :-))))

    طب بدل ماتزعق فينا كده وتزعل نفسك، ادينا لنك الحلقة دي عشان نعرف ايه الأشياء اللي غابت عنا...

    انا اللي شايفاه ان المادة 189 مافهاش فقرة أولى وفقرة تانية... هي كلها على بعضها فقرة واحدة والمادة 189 مكرر بتحيل البرلمان عليها... فلو تكرمت وجبت اللنك هابقى شاكرة جداً لحضرتك... يمكن توضحلي حاجة غابت عني

    ردحذف
  15. ياجماعة حرام عليكم لخبطتونا!!
    يعني دلوقت أنا عاوزه أشوف مصر أحسن من أحسن بلد ف الدنيا
    فلما كده أروح اقول نعم
    ولا اقول لا
    ولا ما اروحش أعمل حاجة من أصله ؟؟ وأقاطع الاستفتاء ده ؟؟
    فهموني - ببساطة - الله يرضى عليكم
    اعتبرو ان لسه فيه ناس بينكم الف باء سياسة !!
    ممكن ؟؟
    وشكرا

    ردحذف
  16. قول نعم ,, وانتخب في مجلس الشعب شخص امين يدور على مصالحك ,, مش الشخص اللي يوظف ابنك او يرشيك عشان تنتخبه

    ردحذف
  17. طيب ليه يا جماعه ما يعملولناش دستور جديد زى الدول المتحضره اللى بره دى
    بدل ما نقعد نلغبط نفسنا فى يمكن وما يمكنشى
    وليه اساس ما يتعملش دستور جديد على الاقل فى الفتره اللى قعدوا يعدلوا فيها الدستور القديم كان زمانهم عملوا دستور جديد ويكون فيه كل المطلوب بدل ما نعدل دلوقتى وبعدين نرجع نلغى ونعمل من اول وجديد


    ما اللى عايز يعمل دستور جديد كان عمله من الاول مش قعد يعدل ويعمل استفتاء ال ايه بعد كدا هيبقا يلغيه خالص ويعمله من اول وجديد

    ياريت حد يرد عليا ويفهمنى اى حاجه غايبه عنى لو كنت بقول كلام غلط
    وشكرا

    ردحذف
  18. المادة 189 بكل التعديلات و المكررات لم تحمل إلزاما لأي من الرئيس أو المجلسين بالتقدم بطلب لتغيير الدستور

    فالمادة 189 مكرر قد ألزمت المجلسين
    1-بالاجتماع
    من أجل
    2-اختيار جمعية تأسيسية تنتهي من الدستور الجديد في ستة أشهر...نعم

    و لكن في السطر الأخير منها
    (وذلك كله وفقًا لأحكام الفقرة الأخيرة من المادة 189)
    اشترطت هذه المادة
    أن يتم الأمرين-باستخدام كلمة كله-(الاجتماع و الاختيار) بلا أي تعارض مع احكام الفقرة الأخيرة المضافة للمادة 189

    و بالعودة لهذه الفقرة الأخيرة المضافة نجد أنها لم تلزم
    أيا من رئيس الجمهورية أو المجلسين بالتقدم بطلب لتغيير الدستور
    فإن أحجما كلاهما عن طلب تغيير الدستور فليس هناك أي تعارض مع احكام الفقرة الأخيرة المضافة للمادة 189

    يعني بالبلدي كده
    ح يكون عندنا دستور
    كتاب عظيم
    نفذته جمعية تأسيسية على أعلى مستوى
    و ف مدة سنه على الأكتر(6شهور من انتخاب المجلسين+6 من انتخاب الجمعية التأسيسية)

    فعلا ح يكون جاهز و رائع

    لكن ابقى قابلني لو حد من الريس
    أو المجلسين طلب أنه يكون مكان المرقع بتاع 1971

    يعني انت وحظك
    و ساعتها ح يكون الحق على الوحشين اللي ماطلبوش
    تغييرالدستور

    و أنا و انت يا صاحبي نشرب م البحر
    و نبقى اشترينا الترماي اللي ح يفرمنا تلاتين سنة تاني.


    و أنا أتساءل
    هل عجزت اللجنة عن جعل الالزام بتغيير الدستور واضحا جليا بلا لبس خاصة أنه المطلب الشعبي الأول؟

    و الاجابة
    بالقطع اللجنة لم تعجز
    و لكن هناك غرضا دفعها لصياغة توحي بالالزام و لكن لا تحققه

    معقوله عجزت يا طارق يابشري عن الصياغة الواضحة؟؟
    معقوله..دا انت طارق البشري يا راجل!!!

    و الله حرام..حرام..حرام

    ردحذف
  19. المادة 189 بكل التعديلات و المكررات لم تحمل إلزاما لأي من الرئيس أو المجلسين بالتقدم بطلب لتغيير الدستور.
    و الصياغة أتت بمنتهى الخبث

    فالمادة 189 مكرر قد ألزمت المجلسين
    1-بالاجتماع
    من أجل
    2-اختيار جمعية تأسيسية تنتهي من الدستور الجديد في ستة أشهر...نعم

    و لكن في السطر الأخير منها
    (وذلك كله وفقًا لأحكام الفقرة الأخيرة من المادة 189)
    اشترطت هذه المادة
    أن يتم الأمرين-باستخدام كلمة كله-(الاجتماع و الاختيار) بلا أي تعارض مع احكام الفقرة الأخيرة المضافة للمادة 189

    و بالعودة لهذه الفقرة الأخيرة المضافة نجد أنها لم تلزم
    أيا من رئيس الجمهورية أو المجلسين بالتقدم بطلب لتغيير الدستور
    فإن أحجما كلاهما عن طلب تغيير الدستور فليس هناك أي تعارض مع احكام الفقرة الأخيرة المضافة للمادة 189

    يعني بالبلدي كده
    ح يكون عندنا دستور
    كتاب عظيم
    نفذته جمعية تأسيسية على أعلى مستوى
    و ف مدة سنه على الأكتر(6شهور من انتخاب المجلسين+6 من انتخاب الجمعية التأسيسية)

    فعلا ح يكون جاهز و رائع

    لكن ابقى قابلني لو حد من الريس
    أو المجلسين طلب أنه يكون مكان المرقع بتاع 1971

    يعني انت وحظك
    و ساعتها ح يكون الحق على الوحشين اللي ماطلبوش
    تغييرالدستور

    و أنا و انت يا صاحبي نشرب م البحر
    و نبقى اشترينا الترماي اللي ح يفرمنا تلاتين سنة تاني.


    و أنا أتساءل
    هل عجزت اللجنة عن جعل الالزام بتغيير الدستور واضحا جليا بلا لبس خاصة أنه المطلب الشعبي الأول؟

    و الاجابة
    بالقطع اللجنة لم تعجز
    و لكن هناك غرضا دفعها لصياغة توحي بالالزام و لكن لا تحققه

    معقوله عجزت يا طارق يابشري عن الصياغة الواضحة؟؟
    معقوله..دا انت طارق البشري يا راجل!!!

    و الله حرام..حرام..حرام

    ردحذف
  20. المادة 189 مكرر تلزم بوضع دستور جديد فور انتخاب المجلسين

    ردحذف
  21. كلمة الفقرة الاخيرة المقصود بها الفقرة التي اضيفت من خلال التعديلات وهي "ويعرض رئيس الجمهورية نتيجة الاستفتاء في خلال 15 يوما على الشعب و....دي الفقرة الاخيرة " ويعرض رئيس الجمهورية المشروع خلال خمس عشرة يوماً من اعداده على الشعب لإستفتائه فى شأنه، ويعمل بالدستور من تاريخ إعلان موافقة الشعب عليه فى الاستفتاء."

    ردحذف
  22. الحقيقة يا محمد ان الناس اختلفت في بيان ايه هي الفقرة الأخيرة دي اللي بتشير ليها الماجة 189 مكرر... وده لأن المادة 189 اللي بيتم احالتنا عليها كلها على بعضها فقرة واحدة...

    فيه ناس زيك بيقولوا انها من أول "ويعرض رئيس الجمهورية..." وفيه ناس غيرك بتقول ان الفقرة دي تبتدي عند "وتتولي الجمعية التاسيسية..."

    ولأن الأمر مش واضح فالمادة 189 مكرر بالنسبة لي تظل مبهمة... خاصة وزي ما بقوللك ان 189 كلها على بعضها فقرة واحدة مش متقسمة لكذا براجراف مثلا..

    صدقني لو كانت صياغة المادة دي أكتر دقة ماكانش هايكون عندي أي مشكلة

    ردحذف
  23. معلش مع احترامي،

    الفقرة الأخيرة في 189 بتقول: "ويعرض رئيس الجمهورية المشروع خلال خمس عشرة يوماً من اعداده على الشعب لإستفتائه فى شأنه، ويعمل بالدستور من تاريخ إعلان موافقة الشعب عليه فى الاستفتاء."

    هي دي أحكام الفقرة الأخيرة يا أستاذنا، لكن بقية المادة 189 فهي اختيارية، ولكن 189 مكرر جعلتها إلزامية...

    معلش اسمع شرح الناس اللي كتبوا الدستور لإن دي نصوص قانونية وما ينفعش نتعامل معها بطريق الاستعجال كما هو واضح من هذا المقال:

    http://www.youtube.com/watch?v=BGGiL0GZk1k

    ردحذف
  24. أنا جيت تاني
    السلام عليكم
    طب كده بقى إحنا لازم نروح ونقول لاء
    سبحان الله أنا ولا أعرف حاجة في السياسة ومن ساعة ما قالو تعديل وماتعديلشي قلت مش هينفع ولازم دستور جديد
    دستور ياخوانا
    وبعدين سؤال جانبي هامشي من أخت ليكم في الله والوطن
    صلوا ع النبي
    لما القيادة اللي بايديها الامر شايفه ان اتلدستور لا زال قائم وهيعدلوه ،
    امال حسني مبارك تنحى على أى أساس ؟؟؟
    لإني عرفت إن مفيش تنحي في الدستور سبب المشكله ؟؟
    يعني طالما مبارك ماعملش بالدستور اللي كان كل شويه والتانيه بيأيفه على مقاسه ومقاس المحروس ابنه
    إذا كان مبارك ماعملش بيه وسلم سلطات الرئاسة لفتحي سرور -والحمد لله ان ده طبعا محصلش -
    وراح أبوجمال جاب حاجة بعيدة خالص عن الدستور اللي هي التنحي ،،
    طيب مبارك ماعملش بالدستور يا ناس !
    إحنابقى نعمل بيه ونعدل فيه ليه يامؤمنين ؟؟؟
    فهموني الله يرضى علينا وعليكم .
    ويارب أصلا اكون قدرت أوضح سؤالي ،
    رحاب .

    ردحذف
  25. ده قال وفقا للفقرة الأخيرة وليس كل المادة كلها

    ردحذف
  26. انا نفسي الاخوة المؤيدين يبطلو كلمة ( انا سمعت وفلان بيقول والتلفزيون بيقول ... الخ ) ياريت نحكم عقلنا ونقرا المادة ونفهمها بعقولنا وناخد بالنا من مادة 189 حيث انها كلها حتة واحدة ومعنى استندت لفقرة فيها يبئا الفقرة ده فين بالعقل ؟؟؟؟؟ طبعا في المادة 189 !! وبلاش فلسفة واللي مش فاهم يسأل أهل الشأن ..

    بعدين نصوص المواد فيها لف ودوران ولو النية سليمة من الاول كان قالها مباشرة بالزام الرئيس ومجلس الشعب بوضع دستور جديد وخلال فترة معينة مش شوية يجيلي هنا وشوية من هنا ( ده شغل تسويف وتأكيل البلوظة )

    ياجماعة بالله عليكم حكمو عقلكم انا لغيت دلوقتي مش شايف اي تبريرات منطقية لكن كلها (سمعنا - فلان قال ) اما باقي التبريرات اكنك جبت لون احمر وجبت واحد قالك لا ده مش لون احمر والسبب لانو احمر !!!

    لالالالالالالالالالالالالالالالالالا للترقيع ولا ينفع ترقيع الجسد الفاسد !!

    ردحذف